समर्थ भारत वृत्तसेवा
शिक्रापूर (शेरखान शेख) ता. १६ : गेली काही दिवसांपासून बैलगाडा शर्यती सुरु झाल्यानंतर बैलांना लाखो रुपयांची किंमत मिळत असल्याचे सर्वत्र पहावयास मिळत असताना आता पुणे जिल्ह्यातील एका शेतकऱ्याने चक्क गुजरात मधून अडीच लाख रुपयांना गाय खरेदी करुन विमानाने आणली असल्याने या गायची पुणे जिल्ह्यात चर्चा रंगू लागली आहे.
पिंपळे खालसा (ता. शिरुर) येथील रवींद्र शांताराम धुमाळ या शेतकऱ्याला गोरक्षणाची आवड असल्याने त्यांच्याकडे यापूर्वी अनेक गायी आहेत, त्यांना गोरक्षणाची आवड असल्याने अनेक ठिकाणच्या शेतकरी तसेच गोशाळेंशी त्यांचा चागला संपर्क आहे. नुकतेच गुजरात मधील एका इसमाकडे सुवर्ण गिर जातीची गाय असून सदर गाय एका वेळी पंधरा लिटर दुध देत असून हि गाय विक्रीसाठी असल्याची माहिती रवींद्र धुमाळ यांना मित्राकडून समजली.
यावेळी मित्राने धुमाळ यांना गायीचे फोटो देखील पाठवले. फोटो पाहता क्षणीच धुमाळ यांना गाय आवडल्याने त्यांनी थेट गुजरात गाठले. गाय खरेदी करण्यासाठी त्यांनी गायीसाठी थेट अडीच लाख रुपये देऊ करत गाय विमानाने लोहगाव विमानतळ येथे आणून खाजगी वाहनाने गायला घरी आणली. ही गाय घरी येताच अनेकांनी गाय पाहण्यासाठी गर्दी केली तर त्यांनतर दुसऱ्याच दिवशी गायीने गोंडस वासराला जन्म दिला असून आता गायीच्या दुधातून धुमाळ यांना उत्पन्न देखील सुरु होणार आहे. मात्र सध्या शिरुर तालुक्यातील या शेतकऱ्याच्या गायीच्या खरेदीची चर्चा सर्वत्र रंगू लागली आहे.
