मंचर प्रतिनिधी:
मंचरमध्ये (ता. आंबेगाव) उत्तम भाग्य ज्वेलर्सवर सात दरोडेखोरांनी ६.५० लाख रुपयांचा ऐवज चोरल्याची घटना घडली आहे. या दरोडेखोरांनी दरोडा टाकून जाताना दुकान मालकाची आई, मुलगा, मुलीला बांधून ठेवून दमदाटी केली. पोलिसांनी व स्थानिकांनी तत्परता दाखवत घटनास्थळी येऊन ५ दरोडेखोरांना जेरबंद केले असून दोघे फरार झाले आहेत. ही घटना आज पहाटे २ ते ३ च्या सुमारास घडली आहे. दरम्यान जैना समदडिया या धाडसी मुलीने संबंधित हत्यारबंद दरोडेखोरांना प्रतिकार करत थोपविण्यासाठी प्रयत्न केल्याने तिचे कौतुक होत आहे.
मंचर शहराच्या बाजारपेठेत भरवस्तीत उत्तम भाग्य ज्वेलर्स हे सोन्या-चांदीचे दुकान आहे. मागील एक महिन्यापासून दरोडेखोरांनी या दुकानाची रेकी केली होती. संबंधित दरोडे खोरांना दोन स्थानिकांनी मदत करत सर्व माहिती पुरवली. मालक अभिजीत समदडिया हे रात्री दुसऱ्या दुसऱ्या मजल्यावर तर त्यांची आई ललिताबाई (वय ७५), मुलगा यश (वय २१), मुलगी जैना (वय १६) हे पहिल्या मजल्यावर झोपले होते. आज पहाटे २ च्या सुमारास ७ दरोडेखोर ड्रेनेजच्या पाईपवरून तीन मजली इमारतीवर चढले. इमारतीचा वरील दरवाजा तोडून जिन्याने ते खाली असलेल्या सोने-चांदीच्या दुकानात आले. दुकानाचे सायरन बंद करून सीसीटीव्ही कॅमेरा फिरवून त्यांनी आत प्रवेश केला.
उत्तमभाग्य ज्वेलर्स या दुकानातील १८ किलो ७१० ग्रॅम वजनाचे चांदीचे दागिने तसेच २ लाख २२ हजार रुपये रोख रक्कम असा ऐवज चोरट्यांनी लुटला. ऐवज घेऊन परत जाताना एका दरोडेखोराचा धक्का पहिल्या मजल्यावरील दरवाजाला लागला. आत झोपलेला यश याला वडील आले असावेत असे समजून त्याने दरवाजा उघडला. त्यावेळी हातात कोयता, कटावणी घेऊन दरोडेखोरांनी त्याच्यावर हल्ला चढविला. यश पळत आजीच्या खोलीत गेला. त्यावेळी झोपलेल्या जैनाकडे दरोडेखराने मोर्चा वळविला. जैनाने धाडस दाखवत एका दरडोखराला लाथ मारली. त्यावेळी दुसऱ्याने तिचे तोंड दाबले असता तिने त्याच्या हाताचा चावा घेतला. ललिता समदडिया यांना दमदाटी करत तुमच्या घरात रोख रक्कम आहे. आम्ही महिन्यापासून वॉच ठेवला आहे. आम्हाला लॉकरची चावी द्या असे दटावले. मात्र ललिताबाई यांनी त्यांना आपल्याकडे चावी नसल्याचे सांगितले. दरोडेखोरांनी तिघांना आतील रूममध्ये बांधून ठेवले. तसेच तेथील सोन्याचे दागिने ताब्यात घेतले.
या दरम्यान दुसऱ्या मजल्यावर झोपलेल्या अभिजीत समदडिया यांना झटापटीचा आवाज आला. त्यांनी मोबाईलमधील सीसीटीव्ही कॅमेरे तपासले. त्यावेळी दोनजण घरामध्ये उचकापाचक करत असल्याचे दिसले. दुकानावर दरोडा पडल्याचे लक्षात येताच अभिजीत समदडिया यांनी गिरीश समदडिया, नीरज समदडिया, महावीर संचेती, अमोल पारेख यांना घटना कळविली.
दरम्यान पोलिसांना माहिती दिली असता जवळच रात्रगस्त घालत असलेले पोलीस निरीक्षक बळवंत मांडगे पोलीस पथक घेऊन तातडीने घटनास्थळी दाखल झाले. पोलिसांची चाहूल लागताच ५ दरोडेखोर ऐवज घेऊन शेजारच्या इमारतीच्या गच्चीवर गेले. तर २ चोरटे आलेल्या मार्गाने पळून गेले. बाजारपेठेतील नागरिक, काजीपुरा येथील तरुण तसेच परिसरातील महिला, पुरुष मोठ्या संख्येने मदतीसाठी येऊन परिसराला वेढा घातला. गिरीश समदडिया यांच्या इमारतीच्या गच्चीवर लपलेल्या ५ दरोडेखोरांना पोलिसांनी जेरबंद केले. त्यांच्याकडे कोयता, कटावणी, गॅस कटर, गॅस गन व एक बनावट पिस्तूल मिळाले आहे.
वैभव बाळू रोकडे (वय २४ रा. नागाचा खडक मुरबाड), गणेश रामचंद्र टोके (वय २६ रा. नडे ता. मुरबाड), अजय सखाराम भिसे (वय २० रा. कलगाव ता. शहापूर) ग्यानसिंग भोला वर्मा (वय २३ रा. घोडबंदर रोड ठाणे) व मोहम्मद अरमान दर्जी (वय २३ रा. नेहरूनगर कुर्ला) यांना पोलिसांनी मुद्देमालासह पकडले आहे. तर इतर दोघे मुद्देमलासह फरार झाले आहेत. त्यांच्या शोधासाठी पोलीस पथक रवाना झाले आहे. गिरीश समदडिया यांच्या इमारतीच्या गच्चीवर लपलेल्या ५ दरोडेखोरांना पोलिसांनी जेरबंद केले. त्यांच्याकडे कोयता, कटावणी, गॅस कटर, गॅस गन व एक बनावट पिस्तूल मिळाले आहे.
अशी झाली चोरी (व्हिडिओ पाहण्यासाठी येथे टॅप करा)
दरम्यान खेडचे उपविभागीय पोलीस अधिकारी सुदर्शन पाटील यांनी सकाळी घटनास्थळी भेट देऊन पाहणी केली. पोलीस पथकाच्या या कामगिरीबद्दल त्यांनी अभिनंदन केले आहे. पोलीस निरीक्षक बळवंत मांडगे, पोलीस उपनिरीक्षक सोमशेखर शेटे, पोलीस कर्मचारी तानाजी हगवणे, नंदकुमार आढारी, होमगार्ड फैजल खान, अर्जुन ठोंबरे यांनी ही कामगिरी केली आहे. यश व जैना समदडिया यांच्या धाडसाचे कौतुक केले जात आहे. यश याच्या हाताला करकचून बांधल्याने दुखापत झाली आहे. चोरटे सव्वा तास समदडिया यांच्या घरात ठाण मांडून होते. स्थानिक नागरिकांनी दाखवलेली तत्परता याबद्दल पोलिसांनी त्यांना धन्यवाद दिले आहेत.
