विद्यार्थ्यांनी अनुभवला जुन्नरचा हजारो वर्षापूर्वीचा इतिहास.

समर्थ भारत वृत्तसेवा

बेल्हे, ता. २९: समर्थ रूरल एज्युकेशनल इन्स्टिट्यूट संचलित समर्थ गुरुकुल बेल्हे (बांगरवाडी) या सी बी एस इ इंग्लिश मेडिअम स्कूलच्या शैक्षणिक सहलीचे आयोजन छत्रपती शिवाजी महाराजांची जन्मभूमी शिवनेरी किल्ला, अंबा अंबालिका लेणी, नाणेघाट, कुकडेश्वर मंदिर या ठिकाणी नुकतेच करण्यात आले होते. यावेळी विद्यार्थ्यांना प्रसिद्ध लेणी अभ्यासक सिद्धार्थ कसबे यांनी मार्गदर्शन केले. 

शिवनेरी किल्ला 

शिवनेरी किल्ल्यावर पोहचल्यानंतर महादरवाजा पासून ते सर्व सात दरवाजे; त्यावर असलेल्या शरभ शिल्प, दरवाजांची रचना, बांधकाम शैली, त्यांचा इतिहास याबाबत विस्तृत माहिती सांगितली. पुढे शिवाई देवीचे मूळ मंदिर त्यामागील इतिहास व तेथे कोरलेली लेणी यांची माहिती दिली. अंबरखाना, जन्मस्थळ, त्या ठिकाणी असलेली त्याकाळची खापराची पाईप लाईन, कारंजे, बदामी तलाव, त्यातील दगडांचा वापर कुठे केला या संदर्भातील सर्व माहिती विद्यार्थ्यांना दिली.

लेण्या आणि प्राचीन मंदिर

अंबा अंबालिका लेणी, भूत लेणी, भीमाशंकर लेणी यांचा असलेला दोन हजार वर्षांपूर्वीचा इतिहास व त्याबद्द्लची माहिती सांगितली. विशेष म्हणजे एकाच दिवसामध्ये विद्यार्थी प्राचीन धम्मलिपीची अक्षरे ओळखायला व वाचायला शिकली. त्यानंतर नाणेघाट येथे गेल्यावर नाणेघाटाच्या निर्मितीचा इतिहास, तेथील रांजण, लेणी, लेण्यांमध्ये कोरलेल्या प्राकृत भाषा व धम्म लिपीचे वाचन करून माहिती दिली. नाणेघाटाच्या कड्यावरून मुलांनी सुर्यास्त होतानाच्या दृश्याचा आनंद घेतला. शेवटी एक हजार वर्षांपूर्वीचा इतिहास असलेल्या हेमांडपंथी कुकडेश्वर मंदिराची व परिसराची माहिती दिली.

संगीत शिक्षक राहुल दुधवडे यांनी शिवरायांच्या चरित्र्यावर आधारित  गीते व पोवाडे सदर करून विद्यार्थ्यांमध्ये स्फूर्ती निर्माण केली. इतिहासाच्या अभ्यासाबरोबर जुन्नरचे नैसर्गिक वैभव विद्यार्थ्यांनी अनुभवले. या शैक्षणिक सहलीचे आयोजन संस्थेचे सचिव विवेक शेळके,विश्वस्त वल्लभ शेळके यांच्या मार्गदर्शनाखाली करण्यात आले होते.